Xarici dil öyrənmək üçün 5 effektiv yol

Xarici dil öyrənmək üçün 5 effektiv yol

Yeni bir dil öyrənmək çətin, yorucu və bəzən demək olar ki, mümkünsüz görünə bilər. Ancaq yeni bir dil öyrənməyi asanlaşdıran bir çox fərqli yol var. Bu yollar vasitəsi ilə siz həm daha rahat öyrənə, həm də dil öyrənməyi maraqlı hala sala bilərsiniz. Aşağıda qeyd etdiyim metodlar sizlər üçün effektiv və əyləncəli olanlardır. Lakin öncəliklə bir nüansa toxunaq. Yeni dil öyrənməyə hobbi kimi yanaşın. Sevərək öyrənmək ən gözəl metoddur. Məsələn, İngilis dilini bilmək sizlər üçün məcburiyyət təşkil etsə də, daha rahat öyrənmə metodlar ilə bunu əyləncəli hala salmaq olar.

1.Ən çox istifadə olunan sözləri öyrənin.

Hər dildə bütün sözləri bilmək məcburiyyətində deyilik. Gündəlik həyatda istifadə olunan sözləri bilərək, biz öz fikirlərimizi ifadə edə bilər, insanlarla əlaqə qura bilərik. Bu sözləri öyrənmək üçün “Google”-da axtarışa “Top 100 words in …” yazıb hansi dildə istəyirsinizsə, onları axtarmağınız kifayət edir. Zamanla bu sözlərin sayını artırmağı unutmayın.

2.Gün ərzində istifadə edin.

Gündəlik həyatınızda yeni öyrəndiyiniz dilə yer açın. Sadə olaraq telefonunuzun dilini müəyyən sözləri bildikdən sonra öyrəndiyiniz dilə çevirin. Sizə maraqlı gələn sözləri öyrəndiyiniz dilə tərcümə edib göz önündə olacaq bir yerə qeyd edin.

3.Qrammatikaya diqqət edin.

Bəlkə də dil öyrənmənin ən sıxıcı və bəzilər üçün ən çətin hissəsi onun qrammatikasını öyrənməkdir. Amma cümlələri düzgün şəkildə qurmaq, fikrimizi dəqiq ifadə etmək istəyiriksək qrammatikaya öyrənməyə məcburuq. Amma bu, o demək deyil ki, qrammatikanı çətin yollarla öyrənək. Əvvəlcə, həm sıxılmamaq üçün, həm də çətin olmasın deyə ən vacib qrammatik detalları öyrənməyə üstünlük verin. Məsələn, “Zamanlar” hər dildə ən vacib mövzudur. Hadisəni düzgün zamanda ifadə etmək lazımdır. 

4.Bildiyiniz kitabları öyrəndiyiniz dildə oxuyun.

Bu metod xüsusuilə kitabsevərlər üçün idealdır. Hər hansı janrda əvvəl oxuduğunuz və sizə maraqlı gələn bir kitab seçin. Onun öyrəndiyiniz dildə olan versiyasını tapın və oxumağa başlayın. Bu yol ilə həm söz bazanız artacaq, əlavə olaraq öyrəndiyiniz dildə cümlə quruluşları, həyatda istifadə olunan sözləri öyrənmiş olacaqsınız. Kitab seçərkən əvvəlcə, biraz daha rahat olanlarından başlayın.

5.Mobil proqramlardan istifadə

Xarici dil öyrənmək müasir dövrümüzdə çox  rahatdır. Çünkü bizim işimizi asanlaşdıran bir çox mobil tətbiq vardır. İnternetin bu qədər sürətlə inkişaf etdiyi bir dövrdə onun faydalarından bəhrələnməsək olmaz.

Babbel-Bu proqram yeni sözlər və qrammatika üçün əladır.

Duolingo-Artıq günümüzdə çox istifadə edilən və söz bazası üçün ideal proqramdır

British Council-Bu proqramda bir çox resursu siz rahatlıqla əldə edə bilərsiniz.